Ифтитоҳи маркази ташхисию табобатӣ

Дар арафаи таҷлили 25-солагии Истиқлолияти давлатии ҶТ дар маркази ҷамоати деҳоти ба номи Р.Ҳамробоев Маркази ташхисию табобатии «Ганҷина» ба истифода дода шуд. Дар маросими ифтитоҳи он Раиси шаҳр Ғ.Боҳирӣ иштирок ва баромад намуда, сокинони деҳаи Кӯчкакро ба муносибати ба истифода дода шудани боз як маркази саломатӣ дар деҳа шодбош гуфт.

Марказ дорои 7 ҳуҷраи хизматӣ, аз ҷумла, ҳуҷраҳои дандонпизишкӣ, қабули беморон, ташхиси ултрасадо, таҳлилгоҳ, ҳуҷраи доругузаронӣ, таҳлилгоҳи умумӣ ва дорухона мебошад.

Бояд қайд кард, ки сохтмони бинои мазкур соли 2012 оғоз гардида, бо маблағи умумии 160 ҳазор сомонӣ бунёд гардид. Бо баробари ба истифода дода шудани ин маркази саломатӣ 10 нафар шаҳрвандон бо ҷойи кори доимӣ таъмин карда шуданд.

Хурсандии сокинонро ҳадду канор набуд, зеро бо баробари бунёди маркази саломатии «Ганҷина» барои сокинони деҳа баҳри муоинаи саривақтӣ, муолиҷаи бемориҳо ва барқарор намудани вазъи саломатӣ имконияти хуб фароҳам оварда шуд.