Аз ҷониби роҳбарияти шаҳр дар рӯзҳои таҷлил аз 25-умин солгарди Истиқлолияти давлатии кишвар собиқадорони меҳнати шаҳр, ки дар риштаҳои гуногун пурсамар кору фаъолият намуда, баҳри таъмини рушди босуботи диёр, ободониву сарсабзии он ва беҳбуд бахшидан ба пешрафти иқтисодиёту иҷтимоиёт саъю талош варзидаанд, аёдат карда шуданд.

Бо ин мақсад муовини раиси шаҳр Илҳомҷон Ҳомидов ба аёдати якчанд нафар собиқадорони меҳнат ва шахсони барӯманди шаҳр рафта, онҳоро аз номи мақомоти иҷроияи ҳокимияти давлатии вилояти Суғд ва мақомоти маҳаллӣ ба муносибати ин ҷашни фархундаи миллат шодбош гуфт. Ба аёдатшудагон туҳфаи Раиси вилояти Суғд Абдураҳмон Қодирӣ супорида шуд.

Собиқадорон аз ғамхориву дастгириҳои давлат изҳори қаноамандӣ намуда, баҳри гул-гулшукуфии диёр ва ҳаёти тинҷу осудаи халқ дуо карданд.

Чунин аёдату дидорбиниҳо давом доранд.