24 сентябр дар шаҳри Конибодом бо мақсади иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастурҳои Раиси вилояти Суғд муҳтарам Раҷаб Аҳмадзода оид ба ҷамъоварии саривақтӣ ва босифати ҳосили пахта ситоди корӣ баргузор гардид.

Ситод таҳти раёсати Раиси шаҳри Конибодом Даврон Зоҳидзода ва бо иштироки муовини Раиси вилояти Суғд Файзулло Қосимӣ баргузор шуда, дар он муовини якум, муовинони Раиси шаҳр, раисони ҷамоатҳои деҳот, роҳбарони сохтору ташкилоту муассисаҳо ва масъулини соҳа иштирок намуданд.

Дар ситод рафти ҷамъоварии ҳосили пахта, суръати корҳои саҳроӣ ва масъалаҳои марбут ба иҷрои нақшаҳои пешбинишуда мавриди баррасӣ қарор гирифт.

Таъкид гардид, ки дар асоси дастуру супоришҳои Пешвои миллат ва роҳнамоии роҳбарияти вилояти Суғд тамоми имкониятҳо барои сари вақт ҷамъоварӣ намудани ҳосил сафарбар карда шуда, ҳар як рӯзи мусоиди корӣ самаранок истифода шавад.

Ба масъулон, раисони ҷамоатҳои деҳот ва роҳбарони ташкилоту муассисаҳо вазифаҳои мушаххас гузошта шуд, ки барои ҷалби қувваи корӣ, истифодаи самараноки техника ва ташкили муназзами ҳашари пахтачинӣ чораҳои зарурӣ андешида, ҷамъоварӣ ва супоридани пахтаро дар муҳлатҳои муайяншуда ва бо сифати баланд таъмин намоянд.

Рафти иҷрои супоришҳо таҳти назорати роҳбарияти шаҳр қарор дода шуда, масъулияти шахсии роҳбарон барои таъмини натиҷаҳои назаррас дар маъракаи пахтачинӣ таъкид гардид.