Дар мақомоти иҷроияи ҳокимияти давлатии шаҳри Конибодом бо иштироки Раиси шаҳр Даврон Зоҳидзода рӯзи қабули шаҳрвандон баргузор гардид. Дар қабули навбатӣ муовинони Раиси шаҳр, роҳбари дастгоҳ, роҳбарони ташкилоту муассисаҳо ва масъулони сохторҳои дахлдори мақомоти маҳаллӣ иштирок намуданд.

Зимни қабул шаҳрвандон вобаста ба масъалаҳои гуногуни иҷтимоӣ, аз ҷумла таъмини қитъаи замини наздиҳавлигӣ, гирифтани кӯмакҳои иҷтимоӣ, табобати ройгон, беҳтар намудани шароити зист ва дигар мушкилоти мавҷуда муроҷиат карданд.

Ҳамзамон, як қатор сокинон бо пешниҳодҳои созанда ҷиҳати ободонии маҳал, беҳтар намудани инфрасохтори деҳаю маҳаллаҳо ва дар сатҳи баланд таҷлил намудани ҷашни муқаддаси 35-солагии Истиқлоли давлатии Ҷумҳурии Тоҷикистон ба роҳбарияти шаҳр муроҷиат намуданд.

Раиси шаҳри Конибодом арзу муроҷиатҳои шаҳрвандонро мавриди баррасӣ қарор дода, барои ҳалли масъалаҳои матраҳшуда ба масъулини дахлдор дастуру супоришҳои мушаххас дод.

Таъкид гардид, ки муроҷиатҳои шаҳрвандон ҳамеша дар меҳвари таваҷҷуҳи мақомоти иҷроияи ҳокимияти давлатии шаҳр қарор дошта, ҷиҳати баррасии саривақтӣ ва ҳалли онҳо тадбирҳои зарурӣ андешида мешаванд.\