Санаи 16-уми май, дар майдончаи футболи маркази шаҳр маросими кушодашавии мусобиқаи варзишӣ барои дарёфти “Ҷоми Раиси шаҳр” оид ба футбол бахшида ба Рӯзи умумиҷаҳонии футбол бо шукуҳу шаҳомати хос баргузор гардид.

Дар мусобиқа 25 даста аз ҳисоби кормандони мақомоти ҳифзи ҳуқуқ ва ташкилоту муассисаҳои шаҳр фаъолона иштирок намуданд.

Дар маросими ифтитоҳ роҳбарияти шаҳр, намояндагони мақомоти давлатӣ, собиқадорони соҳаи варзиш ва дӯстдорони футбол иштирок намуда, оид ба нақши варзиш дар таҳкими дӯстиву ҳамдигарфаҳмӣ, тарғиби тарзи ҳаёти солим ва ҷалби ҷавонон ба варзиш суханронӣ карданд.

Таъкид гардид, ки дар замони соҳибистиқлолӣ бо дастгириву таваҷҷуҳи пайвастаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи варзиш рушду пешрафти бесобиқа ёфта, барои ҷавонон тамоми шароити мусоид фароҳам оварда шудааст.

Зикр шуд, ки баргузории чунин мусобиқаҳо барои баланд бардоштани маҳорати варзишӣ, таҳкими муносибатҳои дӯстона миёни кормандони ташкилоту муассисаҳо ва тарғиби фарҳанги солим мусоидати фаъол менамояд.

Баъди қисмати расмӣ мусобиқа расман оғоз гардида, дастаҳо барои ба даст овардани “Ҷоми Раиси шаҳр” рақобати варзиширо оғоз намуданд.