Дар толори мақомоти иҷроияи ҳокимияти давлатии шаҳри Конибодом таҳти роҳбарии муовини Раиси шаҳр Наим Қодирӣ вобаста ба иҷрои барқияи мақомоти иҷроияи ҳокимияти давлатии вилояти Суғд ҷаласаи корӣ баргузор гардид.

Зимни ҷаласа зикр гардид, ки мутобиқи иттилои маркази обуҳавосанҷӣ дар даҳаи дуюми моҳи март, аз ҷумла рӯзҳои 10–13 март, пастшавии ҳарорати ҳаво ва боришоти барфу борон дар назар дошта шудааст.

Бо дарназардошти ин ҳолат, ҷиҳати эмин нигоҳ доштани ниҳолҳои дарахтон ва кишти зироатҳои кишоварзӣ аз сармо, ба масъулини соҳа супориш дода шуд, ки тамоми чораҳои пешгирикунандаро сари вақт андешанд. Аз ҷумла, дар байни қаторҳои боғу киштзор ба роҳ мондани дудкунӣ ва дигар тадбирҳои муҳофизатӣ амалӣ карда шавад.

Ҳамзамон таъкид гардид, ки барои пешгирии зарари эҳтимолӣ ба соҳаи кишоварзӣ масъулин бояд назорати ҷиддиро роҳандозӣ намуда, тадбирҳои заруриро сари вақт амалӣ намоянд.