Бо мақсади арҷгузорӣ ба суннатҳои миллӣ ва дар сатҳи баланд истиқбол гирифтани ҷашни байналмилалии Наврӯз дар муассисаи таҳсилоти миёнаи умумии №1 шаҳри Конибодом чорабинии бошукӯҳи фарҳангӣ таҳти унвони «Тоҷикистон – Ватани Наврӯз» баргузор гардид.

Дар чорабинии мазкур намояндаи мақомоти иҷроияи ҳокимияти давлатии шаҳри Конибодом Исмоилова Наргиза, мушовири шуъбаи маорифи шаҳр Азиза Сатторова, роҳбарияти муассиса, омӯзгорон, хонандагон ва дигар меҳмонон иштирок намуданд. Исмоилова Наргиза намояндаи мақомоти иҷроияи ҳокимияти давлатии шаҳр номаи табрикотии раиси шаҳри Конибодом Зоҳидзода Даврони Абдуқодирро ба самъи ҳозирин расонид.

Чорабинӣ дар фазои идона оғоз гардида, хонандагон бо қироати шеърҳо дар васфи баҳор ва Наврӯз, намоиши саҳначаҳои тарбиявӣ, рақсу сурудҳои миллӣ ва барномаи рангини фарҳангӣ хотири ҳозиринро болида гардониданд. Ҳамчунин, дар саҳни муассиса гӯшаҳои идона бо оростани дастархони наврӯзӣ, ҳафтсин ва намоиши ҳунарҳои мардумӣ ташкил карда шуда буд, ки аз фарҳанги ғанӣ ва анъанаҳои неки миллати тоҷик шаҳодат медод.

Зимни суханронӣ меҳмонон иброз доштанд, ки Наврӯз яке аз куҳантарин ҷашнҳои миллӣ ба ҳисоб рафта, рамзи эҳёи табиат, дӯстӣ, ҳамдигарфаҳмӣ ва ваҳдати мардум мебошад. Таъкид гардид, ки маҳз бо ташаббус ва талошҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Наврӯз мақоми байналмилалӣ касб намуда, имрӯз дар саросари ҷаҳон бо шукуҳу шаҳомати хоса таҷлил мегардад.

Дар идомаи чорабинӣ хонандагон саҳнаҳои ҷолиби идона, аз ҷумла рамзҳои баҳор, эҳёи табиат ва расму оинҳои наврӯзиро манзур намуда, бо иҷрои рақсу таронаҳои дилнишин фазои идонаро боз ҳам шукуҳманд гардониданд.

Дар фарҷоми чорабинӣ меҳмонон ба ташаббуси омӯзгорон ва хонандагон баҳои баланд дода, таъкид намуданд, ки чунин чорабиниҳо барои тарбияи насли наврас дар рӯҳияи ватандӯстӣ, худшиносии миллӣ ва эҳтиром ба арзишҳои фарҳангии миллат нақши муҳим доранд.