Бо мақсади арҷгузорӣ ба хизматҳои арзанда ва фаъолияти пурсамари собиқадорони соҳаи маориф ва ба муносибати таҷлили Рӯзи Модар, аз ҷониби муовини Раиси шаҳри Конибодом Раҳмонзода Гулчеҳра, мудири шуъбаи маорифи шаҳр Абдувоҳидзода Фируза Абдувоҳид ва раиси иттифоқи касабаи кормандони соҳаи маорифи шаҳри Конибодом Ашурова Норбибӣ як қатор собиқадорони соҳаи маориф аёдат карда шуданд.

Зимни аёдат аз хизматҳои шоистаи собиқадорон дар роҳи таълиму тарбияи насли наврас ёдоварӣ гардида, барои фаъолияти бисёрсолаи содиқона ва саҳми арзандаашон дар рушди соҳаи маориф изҳори сипосу миннатдорӣ баён карда шуд. Ҳамзамон ба онҳо туҳфаҳои хотиравӣ тақдим гардида, таъкид гардид, ки таҷриба ва дониши ғании омӯзгорони собиқадор дар тарбияи шогирдон ва пешрафти соҳаи маориф аҳамияти калон дорад.

Собиқадорон аз чунин таваҷҷуҳ ва ғамхорӣ изҳори хушнудӣ намуда, ба роҳбарияти шаҳр ва масъулини соҳаи маориф барои қадршиносӣ ва эҳтироми хизматҳояшон миннатдорӣ баён карданд.

Чунин иқдомҳо нишонаи эҳтиром ба заҳмати омӯзгорон ва пос доштани анъанаҳои неки омӯзгорӣ буда, мақоми баланду муқаддаси омӯзгорро дар ҷомеа боз ҳам таҳким мебахшад.