Ҳамасола санаи 25 январ ҳамчун Рӯзи касбии кормандони соҳаи меҳнат ва ҳифзи иҷтимоии аҳолӣ таҷлил мегардад.

Ба ин муносибат имрӯз дар Маркази хизматрасонии иҷтимоии мақомоти иҷроияи ҳокимияти давлатии шаҳр чорабинӣ баргузор гардид, ки дар он муовини Раиси шаҳри Конибодом Гулчеҳра Раҳмонзода иштирок намуда, паёми табрикии Раиси шаҳр муҳтарам Даврон Зоҳидзодаро ба самъи ҳозирин расонид.

Зикр шуд, ки дар давоми солҳои Истиқлоли давлатӣ, бо шарофати сиёсати хирадмандона ва дурбинонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, тамоми соҳаҳои хоҷагии халқ, аз ҷумла соҳаи ҳифзи иҷтимоӣ, рушд намудаанд. Дар ин давра заминаҳои мусоид барои такмили танзими муносибатҳои меҳнатӣ, шуғли аҳолӣ, хизматрасонӣ ба қишрҳои ниёзманд, суғуртаи иҷтимоӣ ва таъминоти нафақа фароҳам оварда шуданд.

Ҳамчунин зикр гардид, ки кормандони соҳаи ҳифзи иҷтимоӣ дар соли сипаригардида дастуру супоришҳои дар Паёми Пешвои миллат ба Маҷлиси Олии Ҷумҳурии Тоҷикистон баёнгардидаро сармашқи фаъолияти худ қарор дода, дар татбиқи қарорҳои Ҳукумати Ҷумҳурии Тоҷикистон, стратегияву барномаҳои соҳавӣ корҳои назаррасро ба анҷом расониданд.

Қайд гардид, ки минбаъд низ кормандони соҳа ҷиҳати татбиқи сиёсати иҷтимоии давлат тамоми тадбирҳои заруриро амалӣ хоҳанд намуд, зеро ғамхорӣ дар ҳаққи ятимон, маъюбон, оилаҳои камбизоат ва дигар гурӯҳҳои осебпазири аҳолӣ яке аз самтҳои муҳими сиёсати иҷтимоии давлат ба шумор меравад.

Дар фарҷом ба як қатор фаъолони соҳа Сипосномаҳои Раиси шаҳр супорида шуда, инчунин ба кормандон туҳфаҳои хотиравии Раиси шаҳр тақдим гардид.