Дар доираи амалисозии вохурии "Деҳа ба деҳа" ва «Маҳалла ба маҳалла» мулоқоти навбатӣ бо сокинони деҳаи Ғалчамулло баргузор гардид. Чорабинӣ бо мақсади таҳкими робитаи мунтазами мақомотҳо бо аҳолӣ, боло бурдани маърифати сиёсӣ ва ҳуқуқии шаҳрвандон, ҳамчунин баррасии мушкилоти мавҷуда сурат гирифт.

Дар мулоқот Акмал Ализода — мудири шуъбаи ташкилию кор бо кадрҳои КИ ҲХДТ дар шаҳри Конибодом ва Баҳодур Маҳмудов - мудири бахши бойгонии МИҲД- шаҳр иштирок намуда, доир ба самтҳои афзалиятноки фаъолияти ҷамъиятӣ ва давлатӣ суханронӣ карданд.

Тавре зикр гардид, татбиқи пурраи қонунҳои амалкунанда, аз ҷумла қонунгузории марбут ба хизмати ҳарбӣ, танзими анъана ва ҷашну маросим, таҳкими пойдории оила ва баланд бардоштани саводнокии ҳуқуқии шаҳрвандон аз самтҳои муҳими фаъолияти мақомотҳо ба шумор меравад. Ҳамзамон, зарурати тақвияти ҳамкории волидайн бо муассисаҳои таълимӣ, баланд бардоштани сатҳи тарбияи ҷисмониву ахлоқии наврасон ва пешгирии омилҳои номатлуб байни ҷавонон таъкид карда шуд.

Иштирокчиён инчунин масъалаҳои вобаста ба пешгирии муҳоҷирати ғайриқонунӣ, дастгирии оилаҳои осебпазир, ҷалби шаҳрвандон ба касбомӯзӣ, фароҳам овардани имкониятҳо барои омӯзиши забонҳои хориҷӣ — бахусус барои занон ва ҷавонон — ва истифодаи самараноки захираҳои мавҷуда дар ин самтро мавриди баррасӣ қарор доданд.

Дар ҷараёни мулоқот ба масъалаи ҷалби бештари сокинон ба корҳои ободонӣ, тозагӣ ва дигар ташаббусҳои ҷамъиятӣ, инчунин ба зарурати баланд бардоштани масъулияти сокинон ва густариши фарҳанги ҳамзистӣ дар маҳалла диққати хоса дода шуд

Сокинони маҳалла дар муҳити озоду самимӣ андеша, пешниҳод ва мушкилоти худро иброз намуда, ба саволҳои худ ҷавобҳои мушаххас гирифтанд.