Ҳамасола дар тамоми ҷаҳон маъракаи иттилоотии «16 рӯзи мубориза алайҳи хушунат нисбат ба занон» баргузор мешавад, ки он ба Конвенсия оид ба бартараф намудани ҳар гуна маҳдудкуниҳои ҳуқуқи занон иртибот мегирад.

Дар доираи ин маърака, санаи 10 декабри соли 2025 дар Коллеҷи технологӣ мизи мудаввар таҳти унвони "Зиндагӣ бидуни хушунат ва зӯроварӣ зебост" доир гардид. Дар чорабинӣ муовини раиси шаҳри Конибодом Гулчеҳра Раҳмонзода ширкат варзиданд.

Дар оғози нишаст зикр гардид, ки баргузории чунин чорабиниҳо ба амалисозии сиёсати давлатӣ дар самти ҳифзи ҳуқуқи оила, баланд бардоштани маданияти ҳуқуқии ҷавонон, таҳкими нақши оила, ташаккули оилаи солим ва тарбияи ҳисси масъулиятшиносӣ дар миёни насли ҷавон равона гардидааст. Ҳамзамон, чунин иқдомҳо барои тараннуми арзишҳои олии оила, тарбияи ҷавонон дар рӯҳияи ватандӯстӣ ва пешгирии омилҳои номатлубу хушунати хонаводагӣ мусоидат мекунанд.

Таъкид шуд, ки ҳадафи асосии баргузор намудани ин гуна мизҳои мудаввар ҷалби диққати ҷомеа ба мушкилоти зӯроварӣ нисбати занон, баланд бардоштани мақоми иҷтимоию сиёсӣ ва маърифати ҳуқуқии занон, инчунин коҳиш додани сатҳи хушунати хонаводагӣ мебошад.

Чорабинӣ бо саволу ҷавоб, мулоҳизаҳои иштирокчиён ва мубодилаи таҷрибаи созанда анҷом ёфт.