ҚАДРШИНОСИИ ЧИНАКЧИЁН ДАР ХОҶАГИИ ДЕҲҚОНИИ "ҒАЛАБА"

Пахта неъмати бебаҳо ва сарвати давлат маҳсуб ёфта, барои рушди босуръати кишвар ва расидан ба ҳадафи чоруми стратегӣ мусоидат мекунад. Аз ин хотир имрӯзҳо сокинони шаҳр, намояндагони касбу кори гуногун, занони хонанишину имомхатибон, кормандони ташкилоту муассисаҳо ба ҳашари пахтачинӣ баромада, барои ҷамъ овардани дастранҷи марди деҳқон талош меварзанд.

Дар хоҷагиҳои деҳқонии шаҳр ғунучини "тиллои сафед" рӯз то рӯз вусъати тоза гирифта, ҳашарчиён азм доранд, бо истифода аз обу ҳавои ғанимат ин дурри гаронбаҳоро саривақт ва босифат ба хирман резанд, нақшаи дурнаморо иҷро намоянд.

Дар ҳашари пахтачинии хоҷагии деҳқонии "Ғалаба" - и Ҷамоати деҳоти ба номи Раҷаб Ҳамробоев муовини раиси вилоят Зайнура Азимӣ ва намояндагон аз таваллудхонаи марказии вилояти Суғд ширкат варзида, дар ҷамъоварии "тиллои сафед" паҳлӯи марди деҳқон дасти кӯмак дароз намуданд.

Ҳамчунин, муовини раиси вилоят чинакчиёни чобукдасти хоҷагиро бо ҷамъбасти даҳаи дуюми пахтачинӣ шодбош гуфта, бо тӯҳфаҳо қадршиносӣ намуд.