Ба хотири арҷгузорӣ ва расонидани дасти кӯмак ба заҳматҳои шабонарӯзиву сидқидилонаи марди деҳқон имрӯзҳо пахтазор пур аз чинакчиён аст. Кормандони ташкилоту муассисаҳо, соҳибхоназанон, пиру барно обу ҳавои мусоидро ғанимат дониста, рӯзҳои истироҳатии хешро барои ҷамъоварии пахта бахшиданд ва тасмим гирифтаанд, ки дар ғунучини ҳосил саҳм гузоранд.

Раиси шаҳр Даврон Зоҳидзода ва муовини раиси вилоят Зайнура Азимӣ бо чинакчиён аз наздик вохӯрда, аз ҷараёни чиниши пахта, арзиши он ва таъмини хӯроки гарм пурсон шуданд.

Раиси шаҳр Даврон Зоҳидзода зикр намуд, ки босифат ва беталаф ҷамъ овардани "дурри гаронбаҳо" ва расидан ба қадри заҳматҳои марди деҳқон масъулияти шаҳрвандии мо буда, бояд ҳар яки мо дар ин маъракаи муҳим саҳмгузор бошем.

Бо чунин суҳбати гарм аз ҷониби Мақомоти иҷроияи ҳокимияти давлатии шаҳр ба чинакчиёни ҷамоатҳои деҳоти Фирӯзоба ва Куҳандиёр шириниву кулчақанд тақсим карда шуд.

Ҳашарчиён бо арзи сипосу эҳтиром иброз намуданд, ки барои ҷалби боз ҳам бештари чинакчиён аз ҳисоби занону духтарони хонанишин саҳмгузор хоҳанд буд.