Дар толори калони мақомоти иҷроияи ҳокимияти давлатии шаҳр ҷаласаи ҷамъбасти фаъолияти нӯҳмоҳаи соҳаи иқтисодиву иҷтимоии шаҳр дар соли 2023 таҳти раёсати Раиси шаҳри Конибодом Абдусалом Тӯхтасунзода баргузор гардид. Дар оғоз Раиси шаҳр ҷамъомадро ифтитоҳ бахшида, ҳозиринро бо масъалаҳои муҳокимашаванда ошно намуд.

Муовини Раиси шаҳр Н.Қодирӣ оид ба бурду бохти тамоми соҳаҳо дар нӯҳ моҳи соли равон ҳисобот дода, бахусус дар мавриди фаъолияти соҳаи саноати шаҳр ва тадбирҳои андешидашуда дар ин самт, соҳаи иқтисодиёт ва иҷроиши буҷет, соҳаи кишоварзӣ ва ғайраҳо бо таҳлилҳо ва муҳокииаи васеъ гузориш дод.

Сипас Раиси шаҳр дар мавриди тақвият бахшидани кор дар самти маорифу тандурустӣ, фаъол будани кумитаҳои маҳаллӣ дар амалисозии ташаббусҳои муҳими ҷомеа, ғунучини ҳосили пахта, ҷараёни маъракаи даъвати тирамоҳии ҷавонон ба сафи Қувваҳои мусаллаҳ ва дигар корҳои ободониву созандагӣ аз масъулин ва фаъолон пурсишҳо ба амал овард.

Зимни ҷамъомад ба ғолибони арсаи меҳнат - пахтакорону кишоварзони хоҷагии овозадори ба номи Э.Бойматова, ки аввалин шуда нақшаи солонаи пахтасупориро иҷро намуданд, табрикот ва тӯҳфаҳои Мақомоти иҷроияи ҳокимияти давлатии шаҳри Конибодом супорида шуд. Роҳбари хоҷагӣ Шарифҷон Солизода аз дастоварди навбатии ҷамъияти саҳҳомӣ сухан намуда, зикр дошт, ки пахтакорони ботаҷрибаи хоҷагӣ боз то охири мавсим барои ғанӣ гардонидани хирмани шаҳр меҳнат намуда, имкониятҳои мавҷударо равона хоҳанд кард.

Дар ҷаласаи ҷамъбастӣ намояндаи Ҳукумати Ҷумҳурии Тоҷикистон Давлатзода Усмон Гул, намояндаи Мақомоти иҷроияи ҳокимияти давлатии вилояти Суғд, муовини Раиси вилоят Даврон Зоҳидзода иштирок ва суханронӣ намуда, барои боз ҳам бо натиҷаҳои афзун ҷамъбаст намудани соли 2023, саривақт амалисозии ҳадафҳои созандагиву бунёдкорӣ ба фаъолон ва роҳбарони ташкилоту муассисаҳо дастуру тавсияҳои судманд доданд.

Ҷаласаро Раиси шаҳр Абдусалом Тӯхтасунзода ҷамъбаст намуда, дар назди роҳбарон баҳри расидан ба ҳадафҳои дар пешистода вазифаҳои мушаххас гузошт.

00