3 август дар шаҳри Конибодом​ Раиси вилояти Суғд Раҷаббой Аҳмадзода бо роҳбарият ва фаъолони шаҳр машварати корӣ доир намуд.

Дар машварат нахуст ҳисоботи раиси шаҳри Конибодом​ Абдусалом Тӯхтасунзода оид ба вазъи иқтисодиву иҷтимоии шаҳр шунида шуд. Тавре иттилоъ дода шуд, сокинони шаҳри Конибодом фаъолияти худро баҳри дар амал татбиқ намудани дастуру супоришҳои Пешвои миллат​ муҳтарам Эмомалӣ Раҳмон, ки зимни ироаи Паёми навбатиашон ба Маҷлиси Олии Ҷумҳурии Тоҷикистон баён гардиданд, равона карда, баҳри расидан ба натиҷаҳои баланди меҳнатӣ кӯшиш ба харҷ дода истодаанд.

Баҳри татбиқи ҳадафи чоруми саноатикунони босуръати кишвар дар шаҳр​ тадбирҳои зарурӣ андешида шуда, давоми соли 2023 таъсиси 12 корхонаи саноатӣ ба нақша гирифта шуда, аз он дар давоми нимсолаи якуми​ соли ҷорӣ 6 адад корхонаи нав​ мавриди истифода қарор дода шуд.​ Дар давраи ҳисоботӣ ҳаҷми умумии истеҳсоли маҳсулоти саноатии шаҳр бо нархҳои муқоисавӣ 126 млн. 828 ҳазор ​ сомониро ташкил дод.​

Дар ин давра дар ҳамаи шаклҳои хоҷагидории шаҳр ҳаҷми умумии истеҳсоли маҳсулот дар соҳаи кишоварзӣ 506 млн. 152 ҳазор сомониро ташкил дод, ки афзоиш нисбати ҳамин давраи соли гузашта ба 111,5 фоиз, аз ҷумла истеҳсоли маҳсулоти растанипарварӣ 115,7 фоиз ва чорводорӣ 99,3 фоизро дарбар мегирад.

Бо таҳлили вазъи соҳаҳо Раиси вилоят барои вусъатбахшии корҳои ободониву созандагӣ, омодагӣ ба давраи тирамоҳу зимистон, таъмини муассисаҳои иҷтимоӣ бо ангишт, таъмини рушди соҳаҳои саноату кишоварзӣ, истифодаи оқилонаи замин, гузаронидани кишти такрорӣ, омодагӣ ба соли нави хониш, истеҳсоли либоси мактабӣ ва таъмини хонандагон бо либосҳои истеҳсоли ватанӣ ба роҳбарияти шаҳр супоришҳои мушаххас дод.

Сипас, роҳбари вилоят чанде аз собиқадорони меҳнатро аёдат карда, ба онҳо кумакҳои модии худро расонид.