Ба муносибати Рӯзи байналмилалии оила дар тарабхонаи "Висол" чорабинии идона таҳти унвони "Оила сарчашмаи меҳр" бо иштироки 3-ҷуфт оилаҳои намунавии шаҳр - Иномовҳо, Ҷӯраевҳо ва Норбоевҳо, ки дар соҳаҳои гуногуни хоҷагии халқ фаъолият намудаанд, баргузор гардид. Нахуст мудири шуъбаи кор бо занон ва оилаи Мақомоти иҷроияи ҳокимияти давлатии шаҳр М.Муҳитдинова паёми табрикии Раиси шаҳри Конибодом Абдусалом Тӯхтасунзодаро ба самъи ҳозирин расонид. Дар табрикоти Раиси шаҳр оила ҳамчун як рукни муқаддаси рӯзгори инсон арзёбӣ гардида, қайд карда шуд, ки оилаи солиму устувор танҳо тавассути меҳру муҳаббат, эҳтирому садоқат, ҳамдигарфаҳмиву маърифат бунёд мегардад.

Маҳфил бо саволу ҷавобҳои дилчаспу рангин сурат гирифта, оилаҳои намунавӣ аз таҷрибаҳои оилавии худ нақл карда, ҷавононро ба якдигарфаҳмиву эҳтиром дар оила даъват намуданд.

Дар ҷараёни чорабинӣ 2 ҷуфт оилаҳои навбунёд аз қайди расмии ақди никоҳ гузаронида шуда, барояшон шаҳодатномаҳои ақди никоҳ ва ба кӯдакони навзод шаҳодатномаҳои таваллуд дар вазъияти тантанавӣ супорида шуд.

Барномаҳои рангини консертӣ ва саҳнаҳои ҷолиб аз ҳаёти оилавӣ аз ҷониби аҳли ҳунар пешкаш карда шуда, боиси болидахотирии иштирокдорон гардид.

\