Дар идомаи соли роҳҳои обод дар шаҳрамон корҳои мумфаршкунӣ ва ободонии роҳу кӯчаҳо вусъат дорад. Бо кӯмак ва маблағгузории мақомоти иҷроияи ҳокимияти давлатии вилояти Суғд, хоса бо дастгирии Раиси вилояти Суғд Абдураҳмон Кодирӣ роҳи кӯчаҳои Маннонов, Маданият ва Коммунист, ки дар қисми қафои боғи истироҳатии шаҳр ҷойгир аст, мумфаршкунии роҳ ҷараён дорад. Ин роҳ тайи солҳои зиёд ягон таъмирро надида буд. Оғози соли ҷорӣ бо иқдоми шаҳрдорӣ кӯчаи мазкур қисман таъмир ва васеъ гардонида шуда, инак ба таври хушсифат асфалтпуш гардонида мешавад.

Дар кори мумфаршкунӣ ва тармими роҳ ширкати Вектор-М саҳм дошта, таҷдиди роҳро бо сифати баланд анҷом медиҳанд. Аз роҳи мазкур бошандагони 3 кӯча истифода мебаранд, ки ҳоло аз ҷараёни таъмир хушнуду қаноатманданд.

Ҷиҳати мумфаршкунии роҳ 867 ҳазор сомонӣ маблағ ҷудо гардида, масоҳати он зиёда аз 1 км ро дар бар мегирад.