Намоишномаи  нави  театри  давлатии  драмавӣ-мусиқии  ба  номи  Т.Фозиловаи  шаҳрамон  “Вакҳабонувон”  дар  саҳнаи  театр  манзури  дӯстдорони  санъати  театрӣ  гардонида  шуд.  Дар   он  мухлисону  ҳаводорони  театр,  ҳунармандони  маъруфу  шинохтаи  кишвар  ба  мисли  Сайрам  Иссоева,  Каромат  Ҳоҷиева, инчунин  намояндагони  якчанд  шабакаҳои  расонаҳои  ахбори  вилоят  иштирок  карда,  аз  ҳунарнамоии  ҳунарпешаҳои  театр  баҳраманд  гардиданд. 

Вакҳабонувон бонувони ғофилу  ваҳшатзадае  ҳастанд, ки  аз  фирефтагиву  нодонӣ  худ  намедонанд  оқибати  ин  рафторашон  чист.  Зан вақте   дар  даст  сареро  медорад, гумон  мекунад, ки  ин  сари  як  ҳайвони  даррандаест.  Аммо  чун  мефаҳмад,  ки  ин  сари  фарзанди  худаш  аст,  аз  ҷаҳолату  ғафлати  худу  хоҳаронаш   пушаймонӣ  мекунад.

Намоишнома  аз  ҳаёти  қариб  панҷ  ҳазор  сол  пешинаи  Юнон  гирифта  шуда,  ба  қалами  драмматурги  Юнони  қадим  Еврипид  тааллуқ  дорад  ва  дар  саҳнаи  театри  мо  2  моҳ  инҷониб  таҳти  коргардонии  таҳиягари  маъруфи  Осиё  Авлиёқулӣ  Хоҷақулӣ  омода шудааст  ва  дастгири  молиявии  он  Дафтари  Швейтсария  дар  Тоҷикистон  аст.

Пас  аз  тамошои  намоишнома  Раиси  шаҳр  Ғайбулло  Боҳирӣ,  коргардон  Авлиёқулӣ  Хоҷақулӣ,  намояндаи  Дафтари  Швейтсария  Муаттара  Баширова ба  сухан  баромада,  ба  маҳорати касбии  ҳунармандону  таҳиягарони  намоишнома  баҳои  баланд  доданд.

Дар  анҷом  саркоргардони  театр  Муҳиддини  Музаффар  иброз  дошт,  ки  минбаъд  ҳар  ҳафта  рӯзи  шанбе, соати 14.00  дар  саҳнаи  театр  намоишномаи  нав  манзури  тамошобинон  гардонида  шуда,  рӯзи  шанбе  дар  шаҳрамон   Рӯзи  театр  хоҳад  шуд.