Дар коллеҷи омӯзгории шаҳр мулоқоти адибону шоирони маъруфи вилояти Суғд бо ҷавонон доир гардид. Дар  мулоқот  раиси шӯъбаи суғдии иттифоқи нависандагони Тоҷикистон,  шоири  халқии Тоҷикистон  Аҳмадҷони Раҳматзод, муовини раиси шӯрои ҳаракати миллӣ ва эҳёи Тоҷикистон  дар  вилояти  Суғд , олим  Абдуҷалил  Бобокалонов,  муовини раиси иттифоқи  нависандагони  вилояти  Суғд  Муҳаммад Субҳон   иштирок ва  суханронӣ  намуда,  оид  ба  нерӯи  созандаи  ҷавонон  дар  пешбурди  ҷомеа,  саҳми  онҳо  дар  ободиву  шукуфоии ватан  ҳарф заданд  ва  ҷавононро  ба  китобдӯстиву  бомаърифат  будан  ҳидоят  намуданд.

Зимни мулоқот маҳфили зебои шеъру адабиёт доир шуда, иштирокдорон аз ашъори шоири зиндаёд Лоиқ ва аз эҷодиёти шоиру адибони маъруфи кишвар шеърҳо хонда, аз дасти шоир Аҳмадҷони Раҳматзод   китоби тозанашри абёташро бо номи «Шукуфаҳо» ҳадя гирифтанд.  Хамчунин аз ҷониби иттифоқи нависандагон дар вилояти Суғд ба коллеҷи омузгории шаҳрамон ба маблағи 3000 сомонӣ китобҳои тозанашри назмиву насрӣ ройгон тӯҳфа карда хоҳад шуд.

Дар ин маҳфил муовини Раиси шаҳр Ашурматова З.  иштирок ва суханронӣ намуда, ба паёми самимонаи Раиси шаҳрро ба меҳмонон ва иштирокдорон расонида, онҳоро бо Иди ҷавонон тахният гуфт.

Донишҷӯёни коллеҷ    ва хонандагони гимназияи №1-и шаҳрамон   барномаи  рангини  консертиро  дар  поёни  маҳфил  пешкаши  ҳозирин  гардониданд.